កម្ពុជានឹងមានទូរទស្សន៍កីឡាកម្រិតឯកទេសកីឡាជាលើកដំបូង ដើម្បីសម្រេចគោលដៅពីបច្ចុប្បន្នរហូតដល់ស៊ីហ្គេម លើកទី៣២ ឆ្នាំ២០២៣ ទូរទស្សន៍កីឡាថ្មីនេះ មានឈ្មោះថា «ទូរទស្សន៍កីឡាកម្ពុជា» (CSTV-Cambodia Sports Television) ក្រោមការគ្រប់គ្រងរបស់គណៈកម្មាធិការជាតិអូឡាំពិកកម្ពុជា  នឹងត្រូវបើកឱ្យដំណើការសាកល្បង នាចុងឆ្នាំ២០២០ នេះ តាមរយៈអនឡាញជាបណ្តោះអាសន្នសិន។

លោក វ៉ាត់ ចំរើន រដ្ឋលេខាធិការ ក្រសួងទេសចរណ៍ និងជាអគ្គលេខាធិការ គណៈកម្មាធិការជាតិអូឡាំពិកកម្ពុជាបានបញ្ជាក់ថា នៅក្នុងដំណាក់កាលនៃការរៀបចំការប្រកួតស៊ីហ្គេម លើកទី៣២ ឆ្នាំ២០២៣ យើងត្រូវការទូរទស្សន៍ឯកទេសមួយ ។ទូរទស្សន៍ឯកទេសនោះ គឺត្រូវធ្វើការបណ្តុះបណ្តាល និងការរៀបចំទៅក្នុងកម្រិតឯកទេសកីឡា ដែលមានន័យថា ទាំងរបៀបថត ការចាប់មុំថត ឧបករណ៍ថត ត្រូវមានលក្ខណៈពិសេស សម្រាប់វិស័យកីឡា ដោយធ្វើយ៉ាងណាឱ្យទូរទ ស្សន៍នេះជាទូរទស្សន៍ឯកទេស។

ជាមួយគ្នានេះ ទូរទស្សន៍កីឡាកម្ពុជាក៏ជាមជ្ឈមណ្ឌលផ្សព្វផ្សាយពីការត្រៀមស៊ីហ្គេម នាពេលបច្ចុប្បន្នរហូតដល់ព្រឹត្តិការណ៍ ស៊ីហ្គេម ២០២៣ តែម្តង។ នៅចុងឆ្នាំ២០២០ទូរទស្សន៍នេះនឹងអាចដំណើរការផ្សព្វផ្សាយជាលក្ខណៈអនឡានជាបណ្តើរៗសិន។

លោកបញ្ជាក់ថា ដើម្បីជំរុញឱ្យក្លាយទៅជាទូរទស្សន៍ជំនាញអាជីពវិជ្ជាជី  ដូច្នេះខាងកីឡាក៏មានវិជ្ជាជីវៈកីឡាដូចគ្នា ដើម្បីគោរពបាននូវស្តង់ដារមួយ នៅពេលស៊ីហ្គេម ហើយចំពោះប្រព័ន្ធផ្សព្វផ្សាយក៏ត្រូវមានស្តង់ដារស៊ីហ្គេមដែរ ដោយមិនមែនចេះតែធ្វើទៅបានដោយគ្មានអាជីពពិតប្រាកដ ឬគ្មានស្តង់ដារនោះឡើយ”។ លោកបានលើកឡើងថា ការមិនមានស្តង់ដារ គឺធ្វើឱ្យការផលិតនៃប្រព័ន្ធផ្សព្វផ្សាយកីឡានោះមិនអាចត្រូវបានទទួលស្គាល់ជាលក្ខណៈអន្តរជាតិនោះឡើយ ។

ទូរទស្សន៍កីឡាថ្មីមួយនេះនឹងត្រូវផ្សាយតាមប្រព័ន្ធឌីហ្គីថលកម្រិតគុណភាពរូបភាពច្បាស់ល្អ HD ដែលអាស៊ានតម្រូវឱ្យប្រើប្រាស់ស្តង់ដារមួយនេះ ក្រោមការជួយរៀបចំ និងបណ្តុះបណ្តាលពីខាងក្រុមហ៊ុនមួយមកពីសាធារណរដ្ឋកូរ៉េ៕SP